Plantun de Prouvènço

Pèr coumpara dos planto d'encò nostre

Festuca marginata & Abies alba

Festuca marginata

Poaceae Graminaceae

Nom en français : Fétuque de Timbal-Lagrave.

Descripcioun :
Aquelo petugo, proun chanjadisso, trachis dins li tepiero seco e li roucaio. I'a qu'un soulet biais pèr la recounèisse, fau faire uno coupo traversalo dins la fueio e regarda que lou sclerenchime fague tres iscloun (vèire li fotò). Peréu, li fueio soun pu molasso que lis àutri petugo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 80 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Festuca
Famiho : Poaceae
Famiho classico : Graminaceae

Ordre : Poales

Coulour de la flour :
Petalo : ges
Ø (o loungour) enflourejado : 5 à 7 cm
Flourido : Printèms - Estiéu

Sòu : Ca
Autour basso e auto : 0 à 1800 m
Aparado : Noun

Liò : Tepiero seco - Roucaio - Roucas - Esboudèu
Estànci : Mesoumediterran à Mountagnard
Couroulougi : Éuropenco-Sud
Ref. sc. : Festuca marginata (Hack.) K.Richt., 1890

Sapin

Abies alba

Pinaceae

Àutri noum : Sap, Sapino, Abet, Sapi.

Noms en français : Sapin pectiné, Sapin blanc.

Descripcioun :
Pèr pas s'engana emé la serento fau regarda coume soun lis aguio o peréu li pigno (o vacheto). Li fueio dóu sapin soun tóuti dins lou meme plan coume un penche, au contro de li de la serento que soun estacado tout à l'entour de la ramo coume uno brosso. De nouta pamens qu'acò marcho pas pèr d'ùni sap fourestié (coume Abies pinsapo). Li pigno, quouro li poudès vèire, se tènon bèn drecho, alor qu'encò de la serento pendoulon.

Usanço :
La pegoulo (bijoun) dóu sapin èi di proun vulneràri. Ero acampado emé de boutihoun coupa en biais e tanca dins li bosso de la rusclo (O. Madon). S'emplegavo en emplastro sus lis estorso (P. Lieutaghi) o dins li tisano contro lou toussi.